‘Mparti mu juachi alli mammi ccu lli cumpagnelli
Abbrazzata alla pupazza ca t’haiu cusutu
‘Mparti mu ti tiru i capilli ca un ti fha’ ma’ cunzari
E tu pua mi fha’ u mussu ‘nzin’ a quandu un camini tisa a vavìa
‘Mparti mu ti ridu e ti gridu quandu vijiu cca ‘un mangi
Ca si longa e puntuta e siccagna cumu nu chiuavu i parigi
C’haiu fhattu? T’haiu ragata e sagghjiuta supa stu lignu
E stu ligno mo s’ha fattu di chiumbu
E simu cu li gambi ‘nta l’acqua ammianzu i gridati e li chianti
Tu mi guardi aspittandu cume sempi mu ti dicu c’ha fhari
E iu u ‘llu sacciu, iu sulu vulessi muriri prima d’a morti
Ma na mamma è nna mamma e na mamma ha di fhari e ha di diri
E allura: sciù sciù animella, sciù sciù, ca u ‘nne nenti
Un ciangiri ca s’a pupazza ti vidi pua si pigghjia i pagura
Tu abbrazzala e tenila stritta e parracci duci
Dicci: “sciù pupazzella, sciù sciù, ca mo passa”,
Dicci: “sciù cuzzupella, sciù sciù, pua turnamu a jucari
Mauro Vasta
